Qozogʻiston gimnastikachilari 2017 yilda boʻlib oʻtgan Osiyo Chempionatida qoʻlga kiritgan oltin medallar oʻzbekistonlik gimnastikachilarga olib berildi.

Oʻzbekiston Milliy olimpiya qoʻmitasining xabar berishicha, Tailandning Pattayya shahrida badiiy gimnastika boʻyicha Osiyo chempionati boshlanishidan avval Osiyo gimnastika ittifoqi yigʻilish oʻtkazib, medallarni oʻzbek gimnastikachilariga topshirgan.

Osiyo gimnastika ittifoqi Qozogʻiston terma jamoasi gimnastlarining qon tahlilidan olingan doping namunalari ijobiy natija koʻrsatgach, qozogʻistonlik sportchilarning natijalarini bekor qilgan.

2017 yildagi Osiyo Chempionatida Oʻzbekiston gimnastikachilari kumush medallarga sazovor boʻlgan edi. Shundan kelib chiqib, chempionlikni Oʻzbekistonga topshirish toʻgʻrisida qaror chiqarilgan.

Milliy olimpiya qoʻmitasi ayni paytda Pattayyada davom etayotgan Osiyo chempionatida oʻzbek gimnastikachilari, 22 iyun holatiga koʻra, 3 ta oltin, 1 tadan kumush hamda bronza medallarni qoʻlga kiritganini ham maʼlum qildi.